Herstigting

Herstigting: Op 10 Februarie 1859 het ‘n aantal lidmate in Rustenburg bymekaargekom en hulle besware gelig. ‘n Groep manne, onder wie ouderlinge PJW Schutte, kommandant Paul Kruger en SJ Kruger besluit om kennis te gee dat hulle uit die Hervormde Kerk bedank. Hierdie gebeure het aanleiding gegee dat op 11 Februarie 1859, onder die seringboom die Gereformeerde Kerk herstig is. Eerste gemeentes is gestig in 1859 in Rustenburg (Waterberg en Zoutpansberg), Potchefstroom, Pretoria, Lydenburg en Reddersburg. Gemeentes gestig in 1860 is Burgersdorp, Colesberg en Middelburg (KP).